jab se marqum ho gaya hun main
naqsh-e-mafhum ho gaya hun main

zillaton ne panah mangi hai
itna mazmum ho gaya hun main

puchho maslub karne walon se
ab to masum ho gaya hun main

jo azal se na tha muqaddar mein
us se mahrum ho gaya hun main

kaisa mausam hai is ilaqe ka
jis se masmum ho gaya hun main

apni qismat se mat kha kar bhi
tera maqsum ho gaya hun main

muskurahat nagar mein ai 'akhtar'
aa ke maghmum ho gaya hun main