jab se us ne shahr ko chhoda har rasta sunsan hua apna kya hai sare shahr ka ek jaisa nuqsan hua ye dil ye aaseb ki nagri maskan sochun wahmon ka soch raha hun is nagri mein tu kab se mehman hua sahra ki munh-zor hawaen auron se mansub huin muft mein hum aawara thahre muft mein ghar viran hua mere haal pe hairat kaisi dard ke tanha mausam mein patthar bhi ro padte hain insan to phir insan hua itni der mein ujde dil par kitne mahshar bit gae jitni der mein tujh ko pa kar khone ka imkan hua kal tak jis ke gird tha raqsan ek amboh sitaron ka aaj usi ko tanha pa kar main to bahut hairan hua us ke zakhm chhupa kar rakhiye khud us shakhs ki nazron se us se kaisa shikwa kije wo to abhi nadan hua jin ashkon ki phiki lau ko hum be-kar samajhte the un ashkon se kitna raushan ek tarik makan hua yun bhi kam-amez tha 'mohsin' wo is shahr ke logon mein lekin mere samne aa kar aur bhi kuchh anjaan hua