jab shakh-e-gul chatakh ke giri raaz ki tarah
khushbu ka dil laraz utha aawaz ki tarah

wo dhul jis ko di na kisi shahar ne aman
lipti hui hai panw se dam-saz ki tarah

itna hawas-gir tha suraj ka iztirab
manzar badal gae tere andaz ki tarah

panw tale zamin nahin lekin khalaon se
rishta mila raha hun rag-e-saz ki tarah

is munjamid sukut mein 'khalid' meri sada
pathra gai hai hasrat-e-parwaz ki tarah