jalwa-e-ishq haqiqat thi husn-e-majaz bahana tha
shama jise hum samjhe the shama na thi parwana tha

shobade aankhon ke hum ne aise kitne dekhe hain
aankh khuli to duniya thi band hui afsana tha

ahd-e-jawani khatm hua ab marte hain na jite hain
hum bhi jite the jab tak mar jaane ka zamana tha

dil ab dil hai khuda rakkhe saqi ko mai-khane ko
warna kise malum nahin tuta sa paimana tha

'fani' ko kaisa hi sahi phir bhi tujhi se nisbat thi
diwana tha tha kis ka tera hi diwana tha