jigar ki aab bujhe jis se jald wo shai la
laga ke barf mein saqi surahi-e-mai la

qadam ko hath lagata hun uth kahin ghar chal
khuda ke waste itne to panw mat phaila

nikal ke wada-e-wahshat se dekh ai majnun
ki kaisi dhum se aata hai naqa-e-laila

gira jo hath se farhad ke kahin tesha
darun-e-koh se nikli sada-e-wawaila

nazakat us gul-e-rana ki dekhiye 'insha'
nasim-e-subh jo chhu jae rang ho maila