jis din se uth ke hum teri mahfil se aae hain
lagta hai lakhon kos ki manzil se aae hain

mil kar gale hum apne hi qatil se aae hain
kya saf bach ke maut ki manzil se aae hain

rahen hain aashiqi ki nihayat hi pur-khatar
tere huzur hum badi mushkil se aae hain

zulfon ke pech-o-kham mein paden hum to kya paden
hum tang khud hi apne masail se aae hain

bazm-e-butan mein shaikh sukun ke khayal se
daman chhuda ke zikr-o-nawafil se aae hain

ye haq parastiyan meri marhun-e-kufr hain
ye din to faiz-e-sohbat-e-baatil se aae hain

kuchh wahshiyon pe rang bahaaron se the 'alim'
kuchh ehtimam tauq-o-salasil se aae hain