jis mein dilkash wafa ka phul nahin
aisi chahat mujhe qubul nahin

tu jise raund ke guzar jae
main teri rah ki wo dhul nahin

kyon ho lahaq mujhe pashemani
ishq karna to koi bhul nahin

meri khushiyan bhi us ke sath gain
kaun kahta hai main malul nahin

wo mohabbat ka rasta kab hai
jis mein patthar nahin babul nahin

jaise guzre guzar de is ko
zindagi mukhtasar hai tul nahin

shairi khud chamak uthegi 'sahar'
khud-numai mera usul nahin