jis ne dekha wo ho gaya us ka
kaun batlae ab pata us ka

zindagi bhar ye justuju hi rahi
kaun tha apna kaun tha us ka

ho gaya budha wo gharib aakhir
aaj tak ghar na ban saka us ka

us ki thane mein jeb khali thi
bas yahi ek jurm tha us ka

tai kare hai safar wo auron ka
kaun rokega rasta us ka

jaane kya us ne likh diya ho mujhe
is liye khat na padh saka us ka

nazar aa kar bhi wo na aae nazar
waise didar har jagah us ka