jo mil gaya wo khana data ka nam japna
is ke siwa bataun kya tum se kaam apna

rona to hai isi ka koi nahin kisi ka
duniya hai aur matlab matlab hai aur apna

ai barhaman hamara tera hai ek 'alam
hum khwab dekhte hain tu dekhta hai sapna

ye dhum-dham kaisi shauq-e-numud kaisa
bijli ko dil ki surat aata nahin tadapna

be-ishq ke jawani katni nahin munasib
kyunkar kahun ki achchha hai jeth ka na tapna