junun ki sarparasti chahti hai
baghawat ab bulandi chahti hai

bhula kar farq sab achchhe bure ka
ye duniya bas taraqqi chahti hai

maren hindu musalman budhe bachche
siyasat sirf kursi chahti hai

takabbur na-gawari ka sabab hai
ibaadat aajizi bhi chahti hai

faqat wadon se ye bujhti nahin hai
shikam ki aag roti chahti hai

ye chingari siyasat ki watan mein
tabahi hi tabahi chahti hai

use 'mashkur' hai meri tamanna
magar sab ki wo marzi chahti hai