kabhi sar-ba-sajda hua tha dil kabhi har qadam pe qiyam tha
ki wo rasta tere shahr ka sabhi raston ka imam tha

kabhi dard-e-tul-e-firaq tha kabhi dukh ki wasl hai mukhtasar
rah-e-ishq mein to sukun ka koi ek pal bhi haram tha

jise khud-sari ka ghurur tha jo khud-agahi ka zuhur tha
wahi dil gada-e-rah-e-talab teri ek nazar ka ghulam tha

na to ham-safar se umid thi na hi rahbar pe yaqin tha
tere shahar ke sabhi raston ka ajib sa hi nizam tha

isi justuju mein sada raha ki teri talab ko farogh ho
meri khwahishon mein chhupa hua teri aarzu ka dawam tha

mujhe kun kaha to main ho gaya faya-kun mera hi kamal tha
main asir-e-ahd-e-alast hun ki bala mera hi kalam tha

tere nam se jo alag hua to bana 'hidayat'-e-be-nawa
ki azal ke shahr-e-wujud mein tera nam hi mera nam tha