kaf-e-khizan pe khila main is e'tibar ke sath
ki har numu ka talluq nahin bahaar ke sath

wo ek khamosh parinda shajar ke sath raha
chahakne wale gae baad-e-sazgar ke sath

khule daron se talabgar khwab-gahen magar
main jagta raha ek khwab-ham-kanar ke sath

kali khili hai sar-e-shakh aur ye kahti hai
ki koi dekhe tamanna-e-khush-gawar ke sath

wo mujh ko wo na laga dekhta sisakta hua
nigah-e-zard ke sath aur dil-e-figar ke sath

madar-e-waqt wo gunjaishen zara phir se
ki pad rahen kisi diwar-e-saya-dar ke sath