kahin olon ki barsaten kahin moti ki saughaten
nihayat maslahat andesh hain ab badliyan us ki

bila-shuba wahi qatil hai apne ahd ka lekin
shahadat kaun de ki samne hai wardiyan us ki

shahidan-e-wafa boe gae hain ab ke mausam mein
ki lala-zar ho jaen lahu se khetiyan us ki

lahu aasham dariya is tarah hum sur-kharru utre
ki ab tak hichkiyan leti rahi hain naddiyan us ki

damakte chand tare shabnam-o-gul subh ka manzar
abhi bikhri padi hain har taraf angdaiyan us ki

na phir kyun dard ki lazzat masham-e-jaan mein lahrae
'qamar' jab gudgudaen khud-bakhud purwaiyan us ki