karb ki aag mein din-raat pighalte rahiye
karwaten dard ke bistar pe badalte rahiye

kaun aata hai yahan kis ko hai fursat yaro
jism ki aag mein khud apne hi jalte rahiye

un ko pane ki tamanna to hai ek khwab-e-hasin
tifl-e-nau-umr kei manind machalte rahiye

aabla-pai se jal uthe hon har samt charagh
jada-e-zist pe is tarah se chalte rahiye

wadi-e-najd hai daman na ulajh jae kahin
yan har ek gam pe ai dost sambhalte rahiye