kaun kahta hai ki teri justuju karte rahe
sada-dil ushshaq sharh-e-arzu karte rahe

gham ki basti mein karodon chaak-daman-e-alam
zist ke har daur mein fikr-e-rafu karte rahe

jis ne bakhsha hi nahin kuchh sozish-e-gham ke siwa
zindagi bhar hum usi ki aarzu karte rahe

ye thi na-samjhi hamari chhod kar apna dayar
tere kuche mein talash-e-rang-o-bu karte rahe

ai dil-e-khana-kharab us paikar-e-gul ki talash
dar-ba-dar sahra-ba-sahra ku-ba-ku karte rahe