khandaq-e-dahr mein utar to sakun
jo na ab tak hua wo kar to sakun

gard-alud aamad-o-shud hai
chahaton mein guzar basar to sakun

chal rahi hai hawa-e-tund-o-tez
talkhiyon ko zara shakar to sakun

sari ki sari neamaten hain udhar
kuchh udhar ko zara idhar to sakun

dhup barsa rahi hai angare
shahr-e-be-saya ko shajar to sakun

teri duniya mein sarhaden hain bahut
chahun jis samt se guzar to sakun