khatm un ke kabhi sitam na hue
sar hamare agarche kham na hue

tum koi sham aisi batlao
jab hue tum udas hum na hue

apna khaliq to hai sanam apna
hum kisi ke magar sanam na hue

kis ko aankhen mila ke dekhen jab
teri nazron mein mohtaram na hue

aur jine ka kya hunar rakhte
kam se kam hath to qalam na hue

kya hua lafz lafz jine se
ek ibarat mein jab raqam na hue

lutf 'bebak' us safar mein kahan
jis ki rahon mein zer-o-bam na hue