khilta hai jahan par gul-e-nayab-e-tamanna
chhod aae hain us rah mein hum khwab-e-tamanna

bujhta hai kisi dil mein teri yaad ka suraj
raushan hai kisi baam pe mahtab-e-tamanna

sauda hai mere sar mein kisi aur jahan ka
ek aur tamanna hai pas-e-khwab-e-tamanna

utrega kabhi mujh pe mohabbat ka sahifa
chhedega mere dil ko bhi mizrab-e-tamanna

kuchh dil mein tadap hai na meri aankh mein aansu
mathe pe saja rakkhi hai mehrab-e-tamanna

pahunchenge 'ziya' bargah-e-husn mein ek roz
khul jaega hum par bhi kabhi bab-e-tamanna