khirad ki dhund mein aks-e-rukh-e-sahar to mila
junun-e-shauq tujhe koi ham-safar to mila

jala gaya hai koi ret par lahu se charagh
rah-e-junun mein koi naqsh-e-motabar to mila

tumhaare shahr mein sota hun panw phaila kar
koi makan na mila saya-e-shajar to mila

kisi se dil kahan milta hai is zamane mein
khulus lakh tasanno sahi nazar to mila

gham-e-hayat ke gesu sanwar hi jaenge
nigar-e-sham ko aaina-e-sahar to mila

hunar kharid ke laenge be-hunar kitne
hamare shahr ko ek sahab-e-hunar to mila

utar laya bulandi se us ko ai 'hami'
wo aasman ka tara zamin par to mila