khud par nahin tuyur ki ab dastaras ki bas
masti mein ja rahe hain yun su-e-qafas ki bas

khwahish kahan uruj se utri hai zer-e-khak
mazbut dur se use is tarah kas ki bas

mahka hua wajud hai raushan hai meri khak
aise rawan hai phir teri bu-e-nafas ki bas

har dam tere khayal ne nila kiya badan
sab zahr khinch le mera is tarah das ki bas

maktub mein likha hai mujhe ab shifa mile
bimar ko ata ho kabhi ek mas ki bas

aankhen lahu-luhan thin chehre bhi the malal
is tarah didani tha wo sola-baras ki bas

ek umr ki thakan se hai jism shal 'nisar'
manzur ab nahin mujhe bhang-o-jaras ki bas