khudi ko bhul kar main ne kise mahbub tha jaana mohabbat ke jo laeq hai wo hasti mein na pahchana ki jis ko ishq kahte hain koi qabil nahin us ke bhala jaana to bas ishq-e-haqiqi ko bhala jaana kahin farhad shirin the kahin laila kahin tha qais anal-haq kyon kaha mansur ne koi bhi na jaana bhula kar zat wo jis ko hi hai bas ikhtiyar-e-kun firauni zat ke logon ne khud ko hi khuda jaana kudurat se bhare dil hain magar dawe mohabbat ke so aise buz-dilon ke dil ko nafrat ka qila jaana ye hanste chehre dhoka hain ye khushiyon ki banawat hain shahr aabaad dikhte hain haqiqat mein hai virana bahakna us ko kahte hain to saqi aur de mujh ko haq-o-baatil jo samjha de bhale ho kyon na mai-khana nafi kar zat ki 'atir' ki sauda bhi nafe' ka hai jo paya wo hi afzal hai jo khoya wo bhi pahchana