khun palkon pe sar-e-sham jamega kaise
dard ka shahr jo ujda to basega kaise

roz-o-shab yaadon ke aaseb sataenge koi
shahr mein tujh se khafa ho ke rahega kaise

dil jala lete the hum log andheron mein magar
dil bhi un tez hawaon mein jalega kaise

kis musibat se yahan tak tere sath aae the
rasta tujh se alag ho ke katega kaise

aakhir us ko bhi hai kuchh 'jafari' duniya ka khayal
der tak raat gae sath rahega kaise