khushi mile na mile gham se pyar karte hain
wafa ki rah se hum is tarah guzarte hain

hamein khabar hai tera lautna nahin mumkin
magar hum ab bhi tera intizar karte hain

safine daman-e-sahil mein dub jate hain
jo hausla ho to tufan mein bhi ubharte hain

main aaina hun haqiqat ka zehn ka dil ka
agar main samne aaun to log darte hain

sharab-khane ka rasta bada muqaddas hai
janab-e-shaikh bhi is rah se guzarte hain

gulon ke zakhm bharen kaise ashk-e-'shabnam' se
gulon ke zakhm to khun-e-jigar se bharte hain