khushk honton pe mere apne lab-e-tar rakh de
mere saqi mere sahra pe samundar rakh de

maqtal-e-ishq mein ab tak jo padi hai be-sar
koi us lash pe le ja ke mera sar rakh de

zad mein hai tez hawaon ki kitab-e-hasti
koi udte hue auraq pe patthar rakh de

zindagi qaid na kar jism ke aiwanon mein
ye charagh apna kisi rahguzar par rakh de

inqalab asl mein us waqt mukammal hoga
zanu-e-khar pe jab phul koi sar rakh de

ya to har shakhs mere hath pe bai'at kar le
ya koi badh ke mere halq pe khanjar rakh de

aaj 'kazim' jo nahin tere hunar ke qail
ru-ba-ru un ke sahifa koi likh kar rakh de