khwahish-e-wasl ne ushshaq ko ruswa rakkha
husn ne dilkash-o-khush-rang sarapa rakkha

apne kirdar ke daghon ko chhupane ke liye
mere aamal pe tanqid ko barpa rakkha

mere na-karda gunahon ki numaish ke liye
mujh ko zindan mein laga kar bada tala rakkha

saf inkar na karne ke badal zalim ne
meri dil-bastagi ko wada-e-farda rakkha

kaun si chiz girani ki bulandi pe nahin
khun-e-nahaq magar is daur ne sasta rakkha

kar ke mahrum unhen aab-e-rawan se hum ne
nam be-ab guzargahon ka dariya rakkha

apne qad se mera qad dekha nikalta jo 'tuhur'
kar ke sar mera qalam apna sar uncha rakkha