khwahish-e-wasl to be-kar nahin kar sakta
wo meri did se inkar nahin kar sakta

ek main hun ki tujhe pyar bahut karti hun
ek tu hai ki ye iqrar nahin kar sakta

waqt se aage nikalne ki tamanna hai mujhe
tez to panw ki raftar nahin kar sakta

tu mere pyar mein dawe to bahut karta hai
barmala pyar ka izhaar nahin kar sakta

kuchh bhi kar sakta hai lekin wo mera dushman-e-jaan
pith pichhe wo kabhi war nahin kar sakta

dekh sohni ki tarah tujh ko bhi dega ye dagha
ye ghada tujh ko nadi par nahin kar sakta

jo mujhe roz ye kahta hai 'tabassum' hai meri
wo mera daman-e-dil tar nahin kar sakta