khwar-o-ruswa na sar-e-kucha-o-bazar mile hai yahi ishq ka eazaz sar-e-dar mile zindagi se ye raha apni mulaqat ka haal kisi bezar se jaise koi bezar mile hum se pahle bhi ye afsana bayan hota tha kitne gham phir bhi hamein tishna-e-izhaar mile zindagi ne koi aaina dikhaya jab bhi apne chehre pe hamein maut ke aasar mile fikr-e-tabir mein nind ud gai diwanon ki khwab apne hi un aankhon mein jo bedar mile muskuraate hue chehron pe na jao 'makhmur' shayad in mein bhi koi tum sa dil-afgar mile