kinare par jab us ne panw dale
nadi pani se boli ja naha le

use kahna koi rasta nikale
barae nam hi mujh ko mana le

gale se tu jise hans kar laga le
wo sare shahr ko sar par utha le

qayamat tak wahi zinda rahega
jise dard-e-mohabbat mar dale

ye jo sahra hai diwanon ka ghar hai
na diwaren na darwaze na tale

nahin hain ishq ki daulat se waqif
meri barbaadiyon par hansne wale

tasawwur mein teri aahat ko sun kar
khushi se nach uthte hain ujale

wo pagal hai gulon mein khojta hai
pasine se tere khushbu bana le

ab us se yun bichhadna bhi nahin hai
use kahna nae pahlu nikale

nahin hai ab kisi aandhi ke bas mein
mere ghar se teri khushbu uda le