kis bharose pe nikalta ghar se bahar main akela
chaar-su uthe hue hathon mein patthar main akela

maslahat-zadon ki naw sahilon par ja lagi hai
rah gaya sailab mein pisar-e-payambar main akela

mere parcham par meri ruswai ki tahrir hai
dushmanon se ja mila hai mera lashkar main akela

main ye kis ku-e-hirasan mein hun taswir-e-sawal
sab khade hain apne hi sayon se lag kar main akela

sahn mein aahat hai koi aur na chhat par chap hai
sham hai aur be-dili ki sidhiyon par main akela

mujh se bahar zindagi aazadiyan aabaadiyan
aur is tarik se kamre ke andar main akela

sab ke aamalon ki 'nasik' lag chuki hain qimaten
rah gaya hun ab sar-e-bazar-e-mahshar main akela