koi aahat koi sargoshi sada kuchh bhi nahin
ghar mein ek behis khamoshi ke siwa kuchh bhi nahin

nam ek nayab sa likha tha wo bhi mit gaya
ab hatheli par lakiron ke siwa kuchh bhi nahin

be-chhue ek lams ka ehsas ek khamosh baat
us ke mere bich aakhir tha bhi kya kuchh bhi nahin

dosti kaisi wafa kaisi takalluf bartaraf
aap kuchh bhi hon magar kya dusra kuchh bhi nahin

dekhna ye hai ki milne kis se pahle kaun aae
mere ghar se us ke ghar ka fasla kuchh bhi nahin