koi bimar pad jae to achchha kaise karte ho
dikhao to masihai ka dawa kaise karte ho

hazaron jagti aankhen suragh us ka nahin patin
tum aankhen band kar ke us ko dekha kaise karte ho

agar be-mehr hai to roz kyun ja ja ke milte ho
agar patthar use kahte ho sajda kaise karte ho

haya aisi adab itna hamari aql hairan hai
are tum mard ho kar us se parda kaise karte ho

ye aansu tod dega sab hisar-e-jism-o-jaan ek din
ye dariya jab umadta hai to roka kaise karte ho

wo apni ghar grihasti mein magan hai thik hi to hai
jise pana nahin us ki tamanna kaise karte ho