koi dushman koi hamdam bhi nahin sath apne
tu nahin hai to do-alam bhi nahin sath apne

sath kuchh dur tere hum bhi gae the lekin
ab kahan jaen ki khud hum bhi nahin sath apne

wo bhi ek waqt tak khurshid-ba-kaf phirte the
ye bhi ek waqt hai shabnam bhi nahin sath apne

nakhun-e-waqt ne kab zakhm ko dahkaya hai
aise ek waqt ki marham bhi nahin sath apne

samne kitni saliben hain pae be-gunahi
aaj lakht-e-dil-e-maryam bhi nahin sath apne

pi ke socha ki kharidenge gham-e-duniya bhi
tai hue dam to dirham bhi nahin sath apne