koi kuchh bataega kya ho gaya
yahan kaise har but khuda ho gaya

tazabzub ka aalam raha der tak
bil-akhir main us se juda ho gaya

use kya mujhe bhi nahin thi khabar
ki main qaid se kab riha ho gaya

zamin pyas se itni behaal thi
samundar ne dekha ghata ho gaya

ye duniya adhuri si lagne lagi
achanak mujhe jaane kya ho gaya

sharab hum ne yaksan hi pi thi magar
tujhe is qadar kyun nasha ho gaya