koi to tark-e-marasim pe wasta rah jae
wo ham-nawa na rahe surat-ashna rah jae

ajab nahin ki mera bojh bhi na mujh se uthe
jahan pada hai zar-e-jaan wahin pada rah jae

main sochta hun mujhe intizar kis ka hai
kiwad raat ko ghar ka agar khula rah jae

kise khabar ki isi farsh-e-sang par so jaun
mere makan mein bistar mera bichha rah jae

'zafar' hai behtari is mein ki main khamosh rahun
khule zaban to izzat kisi ki kya rah jae