koi zauq-e-nazar hone laga hai
bahut aasan safar hone laga hai

kahan se laoge tum man ki mamta
agar pardes ghar hone laga hai

sambhaalo ab to is bimar ko tum
fasana mukhtasar hone laga hai

mere alfaz zau dene lage hain
ghazal kahna hunar hone laga hai

wo pahle tas-se-mas hota nahin tha
agar se ab magar hone laga hai

labon par ab hai us ke muskurahat
duaon ka asar hone laga hai

chalo 'jazib' bacha kar apna daman
wo rasta rahguzar hone laga hai