kothe ujad khidkiyan chup raste udas
jate hi un ke kuchh na raha zindagi ke pas

do pal baras ke abr ne dariya ka rukh kiya
tapti zamin se pahron nikalti rahi bhadas

mitti ki saundh jate hue sath le udi
dali ka loch pat ki sabzi kali ki bas

ashkon se kis ko pyar hai aahon se kis ko uns
lekin ye dil ki jis ko khushi aa saki na ras

hoshyar ai nawed-e-ajal lut na jaiyo
phirta hai koi aath-pahr dil ke aas pas

aansu ho mai ho zahr ho aab-e-hayat ho
juz khun-e-arzu na mujhe zindagi ki pyas

jaise kabhi talluq-e-khatir na raha
yun ruth kar chali gai 'shohrat' har ek aas