kuchh din se uth rahi hai dil-o-shahar-e-jaan se khak
jab hum hare bhare hain to aai kahan se khak

phir bhi ye dil dhadak utha us ki pukar par
go us pe la ke dali thi sare jahan se khak

chehra ata hai dhul se khali hain donon hath
tum aa rahe ho chhan ke aakhir kahan se khak

hum is liye bhi us se milate nahin nazar
nisbat zamin ko hai bhala aasman se khak

kal tak hara bhara tha tera dil mera dimagh
ab kaise ud rahi hai yahan se wahan se khak

aainda mere sath yahan raftagan bhi hon
so main hata rahi hun har ek dastan se khak

jis but ko mera ishq nahin ram kar saka
wo ho sakega mom tumhaare bayan se khak