kulah-e-kaj badal jati hai ya afsar badalta hai
abhi khulta nahin kya waqt ka tewar badalta hai

ye dekha hai ki mehwar istawa upar badalta hai
falak sadiyon purani nilgun chadar badalta hai

dilon mein soz-e-gham wale dhuen bhi aarzuen bhi
ajam wala musalman har sadi mein ghar badalta hai

nishan-karda gharon ko chhod bhage ghar jo laute hain
to dekha pichhli shab dahliz ka number badalta hai

har ek firaun ke ahwal-e-gharqabi judagana
kabhi dariya badalta hai kabhi lashkar badalta hai

zamana ehtiraman ghum jata hai usi jaanib
jo achchhai ko ek insan ratti bhar badalta hai

hum ab maghrib ke dast-amoz duniya ko nahin lagte
ug aaen baal-o-par apne to baal-o-par badalta hai

koi darwaza bhitar ki taraf khulta nahin 'ehsan'
wahi andar ki kalak hai faqat bahar badalta hai