kya pata kya tha udhar aur kya na tha
qad mera diwar se uncha na tha

zehn murda jism be-his be-libas
main ne wo dekha hai jo dekha na tha

bhagta phirta hun apne-ap se
aisa bhi hoga kabhi socha na tha

malgaje bigde se chehre har taraf
zindagi pahle tujhe dekha na tha

masale kuchh likh gaya diwar par
ek diwana jo diwana na tha

us ki lakhon mein yahi pahchan thi
qabr par us ki koi katba na tha

jis ne jo manga use wo de diya
ai khuda kya main tera banda na tha