la-makan-o-makan bolta hai
jaise sara jahan bolta hai

kyon hain ahl-e-zaban mohr-ba-lab
kya koi be-zaban bolta hai

koi sunta nahin kisi ki har ek
apni apni zaban bolta hai

lakh gard-e-safar rahe khamosh
rahguzar ka nishan bolta hai

sari mahfil dhuan dhuan si hui
kaun shoala-bayan bolta hai

khushk dharti bhi chup nahin rahti
jab kabhi aasman bolta hai

wahm hai ek umid-e-subh-e-tarab
mujh se mera guman bolta hai

aasman tak hai gosh-bar-awaz
kaun ye darmiyan bolta hai

rang-e-rukh be-zaban sahi 'athar'
dil ka hai tarjuman bolta hai