lakir khincho mitao tumhein ijazat hai
hamare dil ko dukhao tumhein ijazat hai

tumhaare nam hai mahfil tumhaare nam hai sham
diye jalao bujhao tumhein ijazat hai

gae dinon mein samundar jahan pe hota tha
wahan pe ret bichhao tumhein ijazat hai

jo darmiyan mein thi baat abhi talak apne
zamane-bhar ko batao tumhein ijazat hai

tumhaari rah ki diwar hum nahin banenge
jahan bhi jaana hai jao tumhein ijazat hai