machhli kud gai pani mein
main hun nahaq hairani mein

rah mein kante bichhwane hain
mujh ko hai mushkil aasani mein

ek siyani yani duniya
aur ek diwana yani main

ek tamanna shishe ki thi
tut gai khincha-tani mein

khwabon ka sauda kar dala
nind ne aakhir nadani mein

aa dhamke hain guzre lamhe
shor bapa hai virani mein

ishq kaha tha na mat kije
rahiye roz pareshani mein

qaum ke khidmat-garon ke din
bit rahe hain sultani mein