main andheron ke nagar se bhi guzar aaya to kya
bujh gain aankhen meri wo ab nazar aaya to kya

kho gae din ke ujalon mein mere khwabon ke chand
arsh se ab chand bhi koi utar aaya to kya

main to ek gahre samundar mein utar jaane ko hun
tu khiraj-e-ashk le kar ab agar aaya to kya

ghar se aane wale tiron ka nishana ban gaya
main muqabil ghair ke sina-sipar aaya to kya

ye dar-o-diwar bhi ab to nahin pahchante
main safar se laut kar bhi apne ghar aaya to kya

bah gae sailab ke dhaaron mein jab sare makin
ab tujhe 'akram' khayal-e-baam-o-dar aaya to kya