main dasht-e-shauq mein kab tak use pukara karun
wo meri hai ya nahin hai ab istikhara karun

kaha hai us ne ki main agle sal aaungi
hai mere dil mein ki rozana ghar sanwara karun

tamam log nazar bhar ke dekhte hain use
to kyon na roz main us ki nazar utara karun

jo ban gae hain mere waste wabaal-e-jaan
main sochta hun ki un sab se ab kinara karun

'sarosh' soch raha hun khada kinare par
main sath chalne ka kaise use ishaara karun