main isi soch mein rahta hun kidhar jati hai
teri khushbu jo mujhe chhu ke guzar jati hai

khat ke badle unhen kuchh phul pahunch jate hain
meri tahrir ba-alfaz-e-digar jati hai

mujh ko aawara-nigahi ka tu ilzam na de
tere dhoke mein hasinon pe nazar jati hai

iztirab-e-nigah-e-shauq pe aati hai hansi
tere hote jo nazar jaanib-e-dar jati hai

the to ghusse mein magar hans bhi diye hain aise
fasl-e-gul jate hue jaise thahar jati hai

main jise kahne ko bechain hun un se 'hadi'
jaane kyon dhyan se wo baat utar jati hai