makan se la-makan tak aa gae hain
kahan se hum kahan tak aa gae hain

jahan jalte hain par hosh-o-khirad ke
junun mein hum wahan tak aa gae hain

bhadak utthi hai kaisi aatish-e-gul
sharare aashiyan tak aa gae hain

khulus-e-dosti par marne wale
hayat-e-jawidan tak aa gae hain

hamari gum-rahi manzil nishan hai
tajassus mein kahan tak aa gae hain

wahan dil mein mohabbat ki kami hai
jahan shikwe zaban tak aa gae hain

tamasha-e-bahaar-e-gul ki shaida
bahaar-e-gul-rukhan tak aa gae hain

maqam apna nahin malum lekin
jahan tum ho wahan tak aa gae hain

kisi ke jalwa-ha-e-hairat-angez
nazar ke imtihan tak aa gae hain

na pahunche khana-e-dil ke makin tak
zamin se aasman tak aa gae hain

guzar kar hum khudi wahm-o-guman se
khuda jaane kahan tak aa gae hain

'rishi' manzil nahin ab dur hum se
ghubar-e-karwan tak aa gae hain