mana hazar sal se hun dar-ba-dar raha
lekin kisi ki chah ke zer-e-asar raha

jo bujh gae charagh zamin-bos ho gae
main jal raha tha is liye main baam par raha

dariya ke par sara qabila utar gaya
lekin wo ek shakhs jise khud ka dar raha

diwana-war phirta raha hai jo dasht dasht
aakhir wo kis guman ke zer-e-asar raha

yaran-e-khush-nasib mein hoga mera shumar
kuchh roz tujh se dost talluq agar raha

phir apne aap ka bhi wo rah paega kahan
kuchh der mere sath agar ham-safar raha

aakhir mujhe bhi tamgha-e-ruswai mil gaya
jo khel khelne ka na tha khel kar raha

'mansur' tera nam shahidon mein aa gaya
ta-hashr warna kaun yahan mo'atabar raha