marhaba dida-e-mai-nosh mein aane wale
ab tere rind nahin hosh mein aa ne wale

dekh saqi rahe khali na tera koi subu
jam hain dast-e-bala-nosh mein aane wale

qatl ai zist teri sej pe dhoke se hue
mar gae sab teri aaghosh mein aane wale

ja-ba-ja dekh ke hanste hue chehron ke mazar
ro pade kucha-e-khamosh mein aane wale

sal-ha-sal jinhen dasht se manus kiya
ab ye panw nahin pa-posh mein aane wale

itna idrak to hai hum ko ki aasani se
hum nahin dast-e-sitam-kosh mein aane wale

sab taraf-dar tere nikle adakar 'hasan'
maslahat-kosh the sab josh mein aane wale