masal kar phenk dun aankhen to kuchh tanwir ho paida
jo dil ka khun kar dalun to phir tasir ho paida

agar dariya ka munh dekhun to qaid-e-naqsh-e-hairat hun
jo sahra gher le to halqa-e-zanjir ho paida

sarasar silsila patthar ka chashm-e-nam ke ghar mein hai
koi ab khwab dekhe bhi to kyun tabir ho paida

main in khali manazir ki lakiron mein na uljhun to
khutut jism se milti koi taswir ho paida

lahu mein ghul gae jo gul dobara khil bhi sakte hain
jo main chahun to sine par nishan-e-tir ho paida