maslahat harf-e-sadaqat pe na dale rakhna
tum andheron mein chhupa kar na ujale rakhna

jo bhi aaega khudai ki sanad mangega
kuchh nae daur ki khatir bhi hawale rakhna

mauj kahti hai ki main sar se guzar jaungi
dil ka farman ki patwar sanbhaale rakhna

rafta-e-sail-e-bala hun ye meri aadat hai
apni kashti kisi girdab mein dale rakhna

us qabile se hun main jis ka ye dastur hai 'saif'
qatl-gahon mein alam apne sanbhaale rakhna